១៧ ធ្នូ ២០១៨
នៅព្រឹកថ្ងៃចន្ទ ១០កើត ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៧ ខែធ្នូ ឆ្នាំ២០១៨ នៅសណ្ឋាគារភ្នំពេញ ធនាគារជាតិនៃកម្ពុជាសហការជាមួយធនាគារកណ្តាលថៃបានរៀបចំសិក្ខាសាលាស្តីពី “ការប្រើប្រាស់ QR កូដស្តង់ដារសម្រាប់ការទូទាត់ឆ្លងដែនរវាង ព្រះរាជាណាចក្រកម្ពុជានិងព្រះរាជាណាចក្រថៃ” ក្រោមអធិបតីភាពដ៏ខ្ពង់ខ្ពស់របស់លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា។ សិក្ខាសាលានេះក៏មានការចូលរួមធ្វើបទបង្ហាញដោយវាគ្មិនមកពីធនាគារកណ្តាលថៃ និងសិក្ខាកាមមកពីមន្រ្តីធនាគារជាតិនៃកម្ពុជា និងតំណាងគ្រឹះស្ថានធនាគារនិងហិរញ្ញវត្ថុ។ គោលបំណង នៃការរៀបចំសិក្ខាសាលានេះគឺដើម្បីផ្តល់ជាវេទិកាមួយក្នុង ការចែករំលែកការយល់ដឹង ពាក់ព័ន្ធនឹងការអភិវឌ្ឍQR កូដស្តង់ដារនិងការទូទាត់ឆ្លងដែនដោយប្រើប្រាស់បច្ចេកវិទ្យា QR កូដស្តង់ដារជា ឌីជីថល ផ្លែតហ្វម។ ក្នុងឱកាសថ្លែងសុន្ទរកថាបើកសិក្ខាសាលា លោកជំទាវ ទេសាភិបាលរង បានមានប្រសាសន៍ថា ប្រព័ន្ធទូទាត់ជាហេដ្ឋារចនាសម្ព័ន្ធហិរញ្ញវត្ថុយ៉ាងសំខាន់ដែលរួមចំណែកក្នុងការអភិវឌ្ឍសេដ្ឋកិច្ច ទន្ទឹមនឹងនោះការរីកចម្រើននៃបច្ចេកវិទ្យាហិរញ្ញវត្ថុបានផ្តល់នូវឱកាស និងអត្ថប្រយោជន៍ដល់គ្រឹះស្ថានធនាគារ និងហិរញ្ញវត្ថុក្នុងការដាក់ឱ្យប្រើប្រាស់សេវា និងឧបករណ៍ទូទាត់ថ្មីៗ ជាពិសេសការទូទាត់ដោយប្រើប្រាស់ QR កូដស្តង់ដារ ដែលនឹងរួមចំណែកលើកកម្ពស់សុវត្ថិភាព ប្រសិទ្ធភាព ព្រមទាំងជំរុញបរិយាប័ន្នហិរញ្ញវត្ថុនិងការទូទាត់ឆ្លងប្រទេស។
