១៧ កុម្ភៈ ២០១៧
កាលពីព្រឹកថ្ងៃទី១៧ ខែកុម្ភៈ ឆ្នាំ២០១៧ ធនាគារជាតិនៃកម្ពុជាបានរៀបចំកិច្ចប្រជុំទ្វេភាគីរវាងធនាគារជាតិនៃកម្ពុជា និង ធនាគាររដ្ឋវៀតណាម ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា និងឯកឧត្តម Le Minh Hung ទេសាភិបាលធនាគាររដ្ឋវៀតណាម ។
កិច្ចប្រជុំប្រារព្ធឡើងក្នុងគោលបំណងពង្រឹងចំណងសាមគ្គីភាព ភាតរភាព មេត្រីភាព និងកិច្ចសហប្រតិបត្តិការល្អជាប្រពៃណីដែលស្ថាប័ន ក៏ដូចជាប្រទេសទាំងពីរមានតាំងពីយូរលង់ណាស់មកហើយ។ តាមរយៈកិច្ចប្រជុំដ៏មានសារៈសំខាន់នេះ ធនាគារកណ្តាលទាំងពីរនឹងស្វែងយល់ពីគ្នាទៅវិញទៅមកកាន់តែច្បាស់ពីបច្ចុប្បន្នភាពនៃស្ថានភាពម៉ាក្រូសេដ្ឋកិច្ច ការរីកចម្រើនវិស័យធនាគារ ពិនិត្យមើលពីវឌ្ឍនភាពនៃកិច្ចសហប្រតិបត្តិការនាពេលកន្លងមក និងជាពិសេសកំណត់ទិសដៅអាទិភាពចម្បងៗ សំដៅពង្រឹងនិងពង្រីកកិច្ចសហប្រតិបត្តិការទ្វេភាគី ជាប្រពៃណីឱ្យកាន់តែរឹងមាំប្រកបដោយចីរភាព សម្រាប់ជាគុណប្រយោជន៍ដល់ស្ថាប័ននិងប្រទេសទាំងពីរ។
