០២ កុម្ភៈ ២០១៥
កាលពីថ្ងៃទី២០-២១ ខែមករា ឆ្នាំ២០១៥ លោកជំទាវ ជា សិរី អគ្គនាយកបច្ចេកទេសធនាគារជាតិនៃកម្ពុជា បានអញ្ជើញជាភ្ញៀវកិត្តិយសចូលរួមក្នុងកិច្ចពិភាក្សាស្តីពីការបង្កើនតួនាទីរបស់ស្ត្រីក្នុងសេដ្ឋកិច្ច៖ ការលើកកម្ពស់តួនាទីហិរញ្ញវត្ថុដើម្បីបង្កើនឱកាសស្មើគ្នាសម្រាប់ស្ត្រីក្នុងការទទួលយក ប្រើប្រាស់ និងទទួលបានអត្ថប្រយោជន៍ពីទីផ្សារសេដ្ឋកិច្ច ដែលប្រព្រឹត្តទៅនៅទីក្រុងបាងកក ប្រទេសថៃ ។
កិច្ចពិភាក្សានេះ ត្រូវបានរៀបចំឡើងដោយមូលនិធិអភិវឌ្ឍន៍មូលធននៃអង្គការសហប្រជាជាតិ (UNCDF) និងនាយកដ្ឋានពាណិជ្ជកម្មនិងការបរទេសនៃប្រទេសអូស្ត្រាលី (DFAT) ក្នុងគោលបំណងស្វែងរកដំណោះស្រាយសម្រាប់បញ្ហានៃតម្រូវការ (ការប្រើប្រាស់និងការអាចទទួលបាន) និងការផ្គត់ផ្គង់ (ការចូលរួមនិងការពង្រីក) ទីផ្សារសម្រាប់ស្ត្រី ដែលអាចផ្តល់នូវឱកាសទីផ្សារថ្មីបន្ថែមទៀត សំដៅឆ្ពោះទៅរកកំណើនសេដ្ឋកិច្ចទាំងមូល ។ សំខាន់ជាងនេះទៅទៀត ទីផ្សារហិរញ្ញវត្ថុជាក្បាលម៉ាស៊ីនដ៏សំខាន់ដែលអាចជះឥទ្ធិពលដល់ការអភិវឌ្ឍទីផ្សារដទៃទៀត ដោយសារវាផ្តល់នូវដើមទុននិងមធ្យោបាយដោះដូរដែលជាធាតុផ្សំសំខាន់ដល់កំណើនសេដ្ឋកិច្ច និងជំរុញឱ្យមានការរីកចម្រើននៅក្នុងទីផ្សាប្រកបដោយបរិយាប័ន្នសម្រាប់ស្ត្រី ។
