២៨ កញ្ញា ២០១៥
កាលពីថ្ងៃទី២៨ ខែកញ្ញា ឆ្នាំ២០១៥ លោកជំទាវ នាវ ច័ន្ទថាណា ទេសាភិបាលរង នៃធនាគារជាតិនៃកម្ពុជា បានដឹកនាំកិច្ចប្រជុំជា មួយលោក Kiyoshi Nishimura នាយកប្រតិបត្តិនៃកម្មវិធី វិនិយោគនិងធានាឥណទាន (Credit Guarantee and Investment Facility - CGIF) ក្នុងគោលបំណងស្វែងយល់ពីដំណើរនៃ កម្មវិធីវិនិយោគ និងការធានាឥណទាន និងលទ្ធភាពដែលកម្ពុជា អាចចំណេញពីកម្មវិធីនេះបាន។ CGIF ត្រូវបានបង្កើតឡើងក្រោម ក្របខ័ណ្ឌគំនិតផ្តួចផ្តើមទីផ្សារសញ្ញាប័ណ្ណអាស៊ី (Asian Bond Markets Initiative - ABMI) កាលពីឆ្នាំ២០១០ ក្នុងគោលបំណង លើកកម្ពស់ការអភិវឌ្ឍសេដ្ឋកិច្ច ស្ថិរភាព និងភាពធននៃ ទីផ្សារហិរញ្ញវត្ថុក្នុងតំបន់ ហើយមានមុខងារសំខាន់ក្នុងការផ្តល់ ការធានាលើសញ្ញាប័ណ្ណបោះផ្សាយជារូបិយវត្ថុក្នុងស្រុកដោយសាជីវកម្មដែលមានលក្ខណៈសម្បត្តិគ្រប់គ្រាន់នៃប្រទេសសមាជិកអាស៊ាន+៣ ។ CGIF មានដើមទុន ៧០០ លានដុល្លារអាមេរិក និងមាន សមត្ថភាពធានារហូតដល់ ១.៧៥ ពាន់លានដុល្លារអាមេរិក ។
